Elektr energiyasi importi qisqardi: O‘zbekistonda ishlab chiqarish 8,4 foizga oshdi
Elektr energiyasi eksporti 21,4 foizga oshgan, importi esa 27,2 foizga kamaygan.
O‘zbekistonda 2026-yil yanvar–sentabr oylarida 69,6 milliard kilovatt-soat elektr energiyasi ishlab chiqarildi. Bu 2025-yilning shu davriga nisbatan 8,4 foizga ko‘p. Bu haqda Energetika vazirligi Jamoatchilik bilan aloqalar bo‘limi bosh mutaxassisi Obidjon Dilmurodov brifingda ma’lum qildi.
Hisobot davrida yirik quyosh va shamol elektr stansiyalarida 10,5 milliard kilovatt-soat, gidroelektr stansiyalarida esa 6,6 milliard kilovatt-soat elektr energiyasi ishlab chiqarildi. Har ikki ko‘rsatkich 2025-yilning to‘liq yillik natijasiga yetgan yoki undan oshgan.
To‘qqiz oy davomida iste’molchilarga 53 milliard kilovatt-soat elektr energiyasi yetkazib berilgan. Shundan 14 milliard kilovatt-soati aholi hissasiga to‘g‘ri keladi.
Shuningdek, elektr energiyasi eksporti 21,4 foizga oshgan, importi esa 27,2 foizga kamaygan.
Yil yakuniga qadar mamlakatda 94,6 milliard kilovatt-soat elektr energiyasi ishlab chiqarish rejalashtirilgan. Qayta tiklanuvchi energiya manbalarida ishlab chiqarish hajmining ortishi elektr ta’minoti imkoniyatlarini kengaytirishga xizmat qilmoqda.
