Gollandiyalik harbiy NATO mashg‘ulotlarida halok bo‘ldi
Hodisa yuzasidan politsiyasi tergov boshlagan.
Niderlandiya qirollik armiyasining 21 yoshli askari Germaniyaning Gardelegen shahrida o‘tayotgan NATO mashg‘ulotlari chog‘ida halok bo‘ldi. “Bastion Lion” nomli mashq doirasida Germaniya va Niderlandiyadan 3 500 ga yaqin askar ishtirok etmoqda. Mashg‘ulotning asosiy maqsadi NATOning sharqiy chegaralarini himoya qilish bo‘yicha tayyorgarlik ko‘rishdir.
Mashg‘ulotlarda 1 800 dan ortiq harbiy texnika va 200 ga yaqin dronlardan foydalanilgan. Ammo baxtsiz hodisadan so‘ng mashg‘ulotlar zudlik bilan to‘xtatildi. Hozircha hodisa tafsilotlari oshkor qilinmagan. Brigada generali Gert-Yan Kuy marhumning yaqinlariga hamdardlik bildirib, “Hozir bir-birimizni qo‘llab-quvvatlash muhim”, deya ta’kidladi.
Voqea yuzasidan Saksoniya-Anxalt politsiyasi tergov boshlab yubordi. Tergovga Germaniya harbiy politsiyasi va Gollandiya jandarmeriyasi ham jalb etilgan. Hodisa NATO mashg‘ulotlaridagi xavfsizlik choralarini yana bir bor muhokamaga olib chiqishi kutilmoqda.
