Namanganda 10-sinf o‘quvchisi avtomobil boshqarib 4-sinf o‘quvchisini urib yubordi
Hozirda tergov harakatlari davom etmoqda.
Namangan viloyatining Uchqo‘rg‘on tumanida og‘ir yo‘l-transport hodisasi yuz berdi. 23-sonli maktabning 10-sinf o‘quvchisi otasiga tegishli Cobalt avtomobilini boshqarib, o‘sha maktabning 4-sinf o‘quvchisini urib yuborgan. Bu haqda viloyat YHXB matbuot xizmati xabar berdi.
Olingan ma’lumotlarga ko‘ra, voyaga yetmagan o‘quvchi mashinani ota-onasi yo‘qligidan foydalanib, yashirincha boshqargan. U harakatlanish chog‘ida yo‘lni kesib o‘tayotgan bolani ko‘rib, to‘xtashga harakat qilganini, biroq uni urib yuborganini aytmoqda. Og‘ir tan jarohatlari olgan bola kasalxonada vafot etgan.
YTHdan so‘ng bolaning otasi Rossiyadan zudlik bilan qaytgan va voqea yuzasidan kechirim so‘ragan:
“Bu xabarni eshitganimda Rossiya Federatsiyasida edim. Darhol chiptani olib, uyga qaytdim. Uyda na men, na onasi bo‘lganmiz. Rossiyada bo‘lgan vaqtimda ham telefon orqali gaplashganimda, unga: ‘Mashina bu o‘yinchoq emas, tegma’, deb ogohlantirgan edim. Aybdorman, bu ish qanday sodir bo‘lganini o‘zim ham tushunmay qoldim. Endi biz o‘sha bolaning o‘limiga sababchi bo‘lib qoldik. Avvalo, meni kechirishsin” – deydi voqea ishtirokchisining otasi.
Mazkur holat yuzasidan voyaga yetmagan shaxsga nisbatan Jinoyat kodeksining 266-moddasi 2-qismi (o‘limga olib kelgan YTH) bilan jinoyat ishi qo‘zg‘atilgan.
