AQShda Ilon Maskning obro‘si keskin pasaymoqda
So‘rovlarga ko‘ra, amerikaliklarning yarmi undan norozi.
So‘nggi ijtimoiy so‘rov natijalariga ko‘ra, Tesla va SpaceX asoschisi Ilon Mask AQSh fuqarolari orasida tobora ommaviy qo‘llab-quvvatlovdan mahrum bo‘lmoqda. Nate Silver boshchiligidagi Silver Bulletin statistik nashrining ma’lumotlariga ko‘ra, amerikaliklarning 53,5 foizi Ilon Mask haqida salbiy fikrda, ijobiy munosabat bildirganlar esa 39,6 foizni tashkil etmoqda.
2024-yil boshida u haqda salbiy fikr bildirganlar atigi 38 foiz edi. Biroq keyingi oylar davomida bu ko‘rsatkich keskin oshdi. Bunga sabab sifatida Maskning AQSh prezidenti Donald Trampning ikkinchi prezidentlik kampaniyasini faol qo‘llab-quvvatlagani, hatto saylovchilarni pul bilan rag‘batlantirgani, shuningdek, Department of Government Efficiency (DOGE) nomli yangi hukumat agentligi orqali ko‘plab federal idoralarda qisqartirishlar amalga oshirgani ko‘rsatilmoqda.
DOGE agentligi orqali Mask va uning hamkorlari AQSh Moliya vazirligi, Ichki daromadlar xizmati (IRS) va Ijtimoiy ta’minot ma’muriyati kabi muhim tizimlarga kirishga uringan.
Maskning mashhurlik reytingi pasaygani Fox News, Politico va Axios kabi yirik ommaviy axborot vositalari tomonidan ham qayd etilgan.
Bunday noxush kayfiyat siyosiy natijalarga ham ta’sir ko‘rsatmoqda. Viskonsin shtatida Mask konservativ Oliy sud nomzodini qo‘llab-quvvatlash uchun yana pul evaziga ovoz to‘plash usulidan foydalandi. Ammo so‘rovlar natijasiga ko‘ra, shtat saylovchilarining yarmi bu aralashuvdan norozi bo‘lgan va har uchinchi saylovchi aynan shu sababli konservativ nomzodga ovoz bermasligini bildirgan.
Natijada Viskonsin shtatidagi saylovda demokratlar qo‘llab-quvvatlagan nomzod Syuzen Krouford g‘alaba qozondi. U raqibini 10 foizlik farq bilan ortda qoldirdi. Shu tariqa, Viskonsin Oliy sudidagi liberal qanot 4–3 hisobidagi ustunlikni saqlab qoldi.
