Papaning dafn marosimiga dunyo yetakchilari tashrif buyuradi
Marosimda 50 nafar davlat rahbari ishtirok etishi kutilmoqda.
Vatikanda joriy yilning 26-aprel kuni bo‘lib o‘tadigan Papa Fransiskning dafn marosimiga dunyo bo‘ylab yirik siyosiy va qirollik arboblarining tashrifi kutilmoqda. Vatikan ma’muriyatining xabariga ko‘ra, marosimda 50 nafar davlat rahbari hamda 10 nafar monarx ishtirok etishi rejalashtirilgan.
Umumiy hisobda, ushbu muhim marosim vaqtida Vatikan hududida kamida 130 ta xorijiy delegatsiya bo‘lishi kutilmoqda.
Ishtirokchilar orasida AQSh prezidenti Donald Tramp, Ukraina prezidenti Vladimir Zelenskiy, Braziliya prezidenti Luis Inasiu Lula da Silva, Argentina prezidenti Xavyer Milei, Britaniya valiahd shahzodasi Uilyam, Ispaniya qiroli Filipp VI, shuningdek, Fransiya prezidenti Emmanuel Makron kabi yetakchilar bor.
Ma’lumotlarga ko‘ra, bu darajadagi tashriflar oldidan xavfsizlik choralari kuchaytirilgan. Rim va Vatikan ustida 24 soatlik uchish taqiqi joriy qilingan, Muqaddas Pyotr maydoniga olib boruvchi Via della Konchilatsione ko‘chasidagi binolar tomlarida snayperlar joylashtirilgan.
“Biz maksimal jangovar tayyorgarlik holatida turibmiz. Oldimizdagi kunlar nihoyatda murakkab va mas’uliyatli bo‘ladi,” – deydi Shveytsariya gvardiyasining harbiy xodimi.
Eslatib o‘tamiz, Papa Fransisk 2025-yil 21-aprel kuni, 88 yoshida vafot etgan edi.
