Rossiya Dnepropetrovsk viloyatiga hujum qildi
Hujum natijasida tinch aholiga zarar yetgan.
Ukraina markazidagi Dnepropetrovsk viloyatida Rossiya qurolli kuchlari tomonidan uyushtirilgan navbatdagi hujum oqibatida 76 yoshli ayol halok bo‘ldi. Bu haqda viloyat rahbari Sergey Lisak Telegram’dagi sahifasida ma’lum qildi.
Ma’lumotlarga ko‘ra, Pavlograd shahri o‘qqa tutilgan, natijada yana sakkiz kishi jarohat olgan. Ba’zilarining ahvoli og‘ir ekani aytilmoqda. Hujum dronlar yordamida amalga oshirilgan bo‘lib, viloyatda bir nechta infratuzilma ob’ektlariga zarar yetgan.
"Rossiya kuchlari tinch aholiga qarshi navbatdagi hujumni amalga oshirdi. Bu urush jinoyatlaridan boshqa narsa emas", — dedi Lisak o‘z bayonotida.
Ukraina harbiylari esa hududda havo mudofaasi ishlaganini, biroq barcha hujumlarni to‘liq qaytara olmaganini bildirmoqda.
