G‘arb davlatlari Isroilga keskin ogohlantirish berdi
Mavjud qamal G‘azoda ocharchilikka sabab bo'lmoqda.
Buyuk Britaniya, Fransiya va Kanada Isroilning G‘azo sektorida olib borayotgan harbiy harakatlari va insonparvarlik yordamining yetkazilishiga qo‘yilgan cheklovlar bois jiddiy choralar ko‘rish bilan tahdid qildi. “Biz doimo Isroilning o‘z fuqarolarini terrorizmga qarshi himoya qilish huquqini qo‘llab-quvvatlab kelganmiz, biroq hozirgi holat nomutanosiblikka aylanib bormoqda”, deyiladi uch davlatning qo‘shma bayonotida.
Ushbu bayonot Isroil armiyasining 16 may kuni boshlagan “Gideon aravalari” nomli yangi harbiy operatsiyasi va Bosh vazir Binyamin Netanyaxuning G‘azo sektorini to‘liq nazoratga olish rejasi ortidan e’lon qilindi. Mutaxassislarning ta’kidlashicha, bu harakatlar G‘azodagi ocharchilik xavfini yanada kuchaytirmoqda. G‘arb mamlakatlari Isroil hukumatining insonparvarlik yordamini rad etishini xalqaro gumanitar huquq buzilishi sifatida baholamoqda.
Buyuk Britaniya hukumati zarur holatlarda maqsadli sanksiyalarni ham o‘z ichiga olgan choralarni qo‘llashga tayyorligini ma’lum qildi. Eslatib o‘tamiz, Isroil 2024 yilning mart oyidan boshlab G‘azo sektoriga dori-darmon, oziq-ovqat va yoqilg‘i olib kirilishini cheklab kelmoqda. Bungacha esa Isroil faqat insonparvarlik yordamini o‘tkazishga rozi bo‘lgan, AQSH, Qatar va Misr vositachiligidagi tinchlik sa’y-harakatlarini qo‘llab-quvvatlashini bildirgan edi.
