Dubaydagi mojaroda 2 o‘zbekistonlik halok bo‘ldi
Nizo avvalgi kelishmovchilik sabab kelib chiqqan.
Dubayda yoqilg‘i quyish shoxobchasida yuz bergan mojaro ikki nafar O‘zbekiston fuqarosining halok bo‘lishiga sabab bo‘ldi. Voqea avvalgi kelishmovchilik zaminida yuzaga kelgani aytilmoqda.
Guvohlarga ko‘ra, marhumlar transport vositasi shinasini shishirish uchun kelgan paytda bir guruh erkaklar ularga hujum qilgan. Ulardan biri qizil Mersedesdan tushgan zahoti tajovuzga uchragan, ikkinchisi esa qochishga urinib, qo‘lga tushgan.
Dubay politsiya xodimlari hodisa joyiga tezda yetib kelib, tergov ishlarini boshlagan. Kuzatuv kamerasi va guvohlarning ko‘rsatmalari asosida boshqa bir amirlikdagi mehmonxonada gumonlanuvchilar qo‘lga olingan.
Rasmiylarga ko‘ra, mojaroga shaxsiy adovat sabab bo‘lgan. Hozirga qadar 11 kishi hibsga olingan va ular tergov jarayonida hodisani tan olgan.
