Boltiq dengizida “uchuvchi kemalar” paydo bo‘ldi
Bu hodisa optik illyuziya ekani aytilmoqda.
Kaliningrad viloyati qirg‘oqlarida joylashgan Boltiq dengizida odamlar suv ustida “uchayotgandek” ko‘ringan kemalarni ko'rishgan. Ushbu g‘ayrioddiy manzara “Mash” Telegram kanalida e’lon qilingan fotosuratlar orqali tarqaldi.
Kemalar suv yuzasida emas, xuddi havoda harakatlanayotgandek ko‘ringani ko‘pchilikni hayratga soldi. Biroq mutaxassislarning aytishicha, bu hodisa aslida optik illyuziya — ya’ni ko‘z aldovidir.
Bunday illyuziya sovuq va iliq havo qatlamlari to‘qnashganda yorug‘likning sinishi natijasida yuzaga keladi. Bu holat uzoqda joylashgan ob'ektlarning joylashuvini noto‘g‘ri ko‘rsatadi.
Natijada, kemalar suvdan uzilgan, go‘yoki havoda suzayotgan holatda ko‘rinadi. Bu tabiiy, ammo noyob hodisa qirg‘oqdagilarning e’tiborini tortgan.
