AQSHda an’anaviy OAVga ishonch so‘nmoqda
Aholining 70% yangiliklarda rost-yolg‘onni ajrata olmasligini bildirgan.
Reuters Institute hisobotiga ko‘ra, amerikaliklar tobora yangiliklarni ijtimoiy tarmoqlar, videoservislar va podkastlar orqali olishni afzal ko‘rmoqda. Televideniye va matbuot auditoriyasi kamaymoqda, ayniqsa yoshlar orasida.
35 yoshgacha bo‘lganlarning yarmidan ko‘pi ijtimoiy tarmoqlarni asosiy axborot manbasi deb biladi. Tramp inaugurasiyasidan so‘ng har beshinchi amerikalik yangilikni podkast orqali olgan. Jo Rogan, Taker Karlson, Ben Shapiro va Kendis Ouens kabi shaxslar axborot maydonida yetakchilik qilmoqda.
Biroq, aynan bloger va siyosatchilar dezinformatsiyaning asosiy manbasi sifatida ko‘rilmoqda. Shuningdek, sun’iy intellekt xizmatlari ham axborot olish vositasi sifatida o‘sib bormoqda. 25 yoshgacha bo‘lganlarning 15% ChatGPT, Gemini yoki Meta AI orqali har hafta yangilik olishini tan olgan.
An’anaviy OAV auditoriyasi qarimoqda, ijtimoiy platformalar esa asosiy axborot maydoniga aylanmoqda.
