AQSh Eron yadroviy obyektlariga zarba berdi
Tramp diplomatik yechim yo‘qligiga ishonch hosil qilgach, harbiy chora ko‘rishga qaror qilgan.
AQSh prezidenti Donald Tramp Eron hududidagi uchta yadroviy inshootga qiruvchi samolyotlar tomonidan zarba berilganini ma’lum qildi. Bu haqda u “Truth Social” platformasida yozgan.
Trampning aytishicha, hujum Fordo, Natanz va Isfaxon yadroviy obyektlariga qaratilgan. “Bomba yuki asosiy ob’yekt bo‘lgan Fordoga tashlandi. Hozir barcha samolyotlar Eron havo hududidan tashqarida va eson-omon uylariga qaytmoqda”, — dedi u.
CNN ma’lumotiga ko‘ra, zarbalarda AQSh havo kuchlari GBU-57A/B bunker-qotil bombasidan foydalangan. U deyarli 2,5 tonna portlovchi modda bilan jihozlangan va 60 metrgacha chuqurlikdagi nishonlarni yo‘q qilishga qodir.
Trampning umid qilishicha, bu zarba Tehronni muzokaralarga qaytishga majbur etadi. CNN manbalariga ko‘ra, u diplomatik yechim yo‘qligiga ishonch hosil qilgach, harbiy chora ko‘rishga qaror qilgan. Hozircha yangi hujumlar rejalashtirilmagan.
