AQSHda bemor massajdan so‘ng falaj bo‘lib qoldi
AQShlik erkak insultdan keyin faqat ko‘zlarini harakatlantira oladi.
AQShning Jorjiya shtatida yashovchi 34 yoshli Jonatan ismli erkak bo‘yin og‘rig‘ini kamaytirish maqsadida massaj (chiropraktik) muolajasiga murojaat qilgan. Ammo muolaja uning hayotini butunlay o‘zgartirib yubordi — u muolaja davomida og‘ir insultga uchrab, to‘liq falaj bo‘lib qoldi.
Ma'lum qilinishicha, Jonatan protsedura chog‘ida to‘satdan o‘zini yomon his qila boshlagan — boshi aylangan, so‘ngra hushyor bo‘lishiga qaramay, atrofdagilarning savollariga javob bera olmay qolgan. U zudlik bilan kasalxonaga yetkazilgan, biroq insult darhol aniqlanmagan.
Tibbiy xatoliklar va kechiktirilgan tashxis natijasida bemor “locked-in syndrome” — ya’ni ongli holda to‘liq falaj holatiga tushib qolgan. Hozirda u faqat ko‘z harakati orqali muloqot qila oladi.
Jonatanning oilasi chiropraktor, shifoxona va muolajada ishtirok etgan bir necha shifokorni sudga bergan. Sud qaroriga ko‘ra, ikki shifokor kasbiy ehtiyotsizlikda aybdor deb topilgan va Jonatanning foydasiga 75 million dollarlik tovon puli undirilgan.
