Rossiya hujumida Kiyevda 5 kishi halok bo‘ldi
Bu haqda Ukraina rasmiylari xabar bergan.
Rossiyaning 22 iyun kechasi va 23 iyun tongida uyushtirgan havo hujumlari oqibatida Kiyev va uning atrofida kamida 5 nafar tinch aholi halok bo‘ldi, bir necha kishi tan jarohati oldi. Bu haqda Ukraina Favqulodda vaziyatlar davlat xizmati va shahar hokimiyati xabar berdi.
Rasmiy ma’lumotlarga ko‘ra, hujumlarda dronlar va qanotli raketalar qo‘llanilgan. Shevchenkivskiy tumanida joylashgan ko‘p qavatli uyga to‘g‘ridan to‘g‘ri zarba berilishi natijasida 4 kishi halok bo‘lgan, kamida 10 nafar fuqaro yaralangan.
Portlashlar oqibatida ko‘plab uylar, metropoliten kirish joylari, avtomobillar va boshqa infratuzilma obyektlari jiddiy zarar ko‘rgan. Mahalliy hokimiyat bu hujumni tinch aholiga va fuqarolik infratuzilmasiga qaratilgan agressiv harakat sifatida baholadi.
Xalqaro hamjamiyat ushbu voqea yuzasidan rasmiy bayonotlar e’lon qilib, Rossiyaning bu kabi hujumlarini keskin qoraladi.
Sevinch Boyqobilova
