Suriyadagi cherkovda xudkush terrorchi o‘zini portlatdi
Portlash oqibatida kamida 20 kishi halok bo‘ldi.
2025-yil 22-iyun kuni Suriya poytaxti Damashqda joylashgan Mar Elias nomli pravoslav cherkovda xudkush terrorchi hujumi sodir etildi. Bu haqda SANA va Reuters agentliklari xabar bermoqda.
Suriya Ichki ishlar vazirligining rasmiy bayonotiga ko‘ra, hujumchi “IShID” terrorchi guruhiga aloqador bo‘lgan. U cherkovga kirib, avval avtomatdan o‘t ochgan, so‘ngra o‘zini portlatgan.
Rasmiy ma’lumotlarga ko‘ra, portlash oqibatida tinch aholidan kamida 9 kishi halok bo‘lgan va 13 kishi yaralangan. Ammo ayrim mahalliy manbalar qurbonlar soni 20 dan oshganini bildirgan. Sog‘liqni saqlash vazirligi esa jarohatlanganlar sonini 53 deb ko‘rsatmoqda.
Ma’lumot uchun, bu hujum Bashar Asad rejimi ag‘darilganidan keyingi davrda Damashqda ro‘y bergan ilk xudkush terakti sifatida qayd etilmoqda. Hozirda voqea joyida tergov ishlari davom etmoqda.
