Andijonda jihodchilarning yashirin jamoati fosh bo‘ldi
Ular kelgusida terrorchilik tashkilotiga qo‘shilishni niyat qilishgan.
Andijonda huquqni muhofaza qiluvchi organlar tomonidan olib borilgan tadbirlar davomida jihodchilar diniy ekstremistik oqimining yashirin jamoati faoliyati aniqlandi. Bu haqida viloyat IIB axborot xizmati xabar bermoqda.
Qayd etilishicha, jamoat yetakchisi — Andijon shahrida yashovchi 1981 yilda tug‘ilgan U.A. o‘z atrofiga 12 nafar shaxslarni yig‘ib, jamoat tashkil etgan holda turli choyxonalarda to‘planib, kelgusida Suriyadagi “Tavhid va jihod katibasi” xalqaro terrorchilik tashkilotiga qo‘shilishni niyat qilishgan. Shuningdek, o‘zaro “Baytulmol” ko‘rinishida pul mablag‘lari yig‘ib, o‘z tarafdorlariga berib kelishgan.
“Jamoat aʼzolarining xonadonlarida o‘tkazilgan tintuv tergov harakatlari davomida turli diniy ekstremistik adabiyotlar va boshqa ashyoviy dalillar olindi. Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, hozirda tergov harakatlari olib borilmoqda”, deyiladi xabarda.
Avvalroq Farg‘ona viloyatining Qo‘qon shahrida Suriyadagi terrorchilarga pul jo‘natib, ularni moliyaviy jihatdan qo‘llab-quvvatlayotganlar ushlangandi.
