Butunlay yopilgan shahar, kelin uchun 27 ta libos, mashhur mehmonlar va hayratlanarli taklifnoma… “Asr to’yi” bo’lgan Jeff Bezos va Loren Sanchesning Venetsiyadagi dabdabali to’yidan eksklyuziv kadrlar (foto va video)
Marosimga kelgan 250 mehmon uchun 90 ta shaxsiy samolyot va 30 ga yaqin elita suv taksilari band qilingan.
Amazon asoschisi Jeff Bezos va jurnalist Loren Sanchesning uch kunlik to‘yi 26–28 iyun kunlari Venetsiyada bo‘lib o‘tdi. Yirik tadbir “asr to‘yi” deb e’lon qilindi. To‘y sababli shahar deyarli yopildi, sayyohlar mehmonxonalardan chiqarildi.
Bezos ikki yuzdan ortiq mehmon uchun hashamatli mehmonxonalarni ijaraga oldi. Ular orasida Aman Venice mehmonxonasi ham bor edi. Mehmonlar orasida Ivanka Tramp, Kardashianlar oilasi va boshqa mashhur shaxslar qatnashdi.
To‘y xavfsizligi kuchaytirildi: mehmonxona yo‘laklari va jihozlar qat’iy nazorat ostida bo‘ldi. Mahalliy aholi norozilik bildirdi, ba’zilari marosimni buzmoqchi bo‘ldi.
Taklifnoma ijtimoiy tarmoqlarda muhokama markaziga aylandi — unda kursiv yozuvlar, kapalaklar va gondolalar tasvirlangan. Sovg‘alar o‘rniga YUNESKOga xayriya qilish so‘ralgan.
To‘y menyusida fransuz qandolatchisi Sedrik Grolening shirinliklari bo‘ldi. U mevali tortlari bilan tanilgan va Instagram’da 13 milliondan ortiq obunachiga ega.
Moda uyi Dolce & Gabbana Loren Sanches uchun 27 ta libos tayyorladi. Mish-mishlarga ko‘ra, u marosim davomida ularning barchasini almashtirib kiygan.
To‘y byudjeti 40–48 million yevroni tashkil etdi. 250 nafar mehmon uchun 90 ta shaxsiy samolyot va 30 ga yaqin elita suv taksilari band qilindi. Asosiy marosim Venetsiya Arsenalida bo‘lib o‘tdi.
