AQShda atrofini timsohlar o‘ragan migrantlar markazi qurilmoqda
Loyihani Florida bosh prokurori faol ilgari surmoqda.
Florida shtatida, Evergleyds botqoq hududida “Timsohli Alkatras” deb nom olgan yangi migrantlar uchun hibsxona qurilishi boshlandi. Ushbu markaz 5 minggacha noqonuniy muhojirni saqlashga mo‘ljallangan bo‘lib, loyihaning yillik qiymati taxminan 450 million dollarni tashkil etadi.
Markazning xavfsizlik choralari uchun katta mablag‘ sarflanmasligi aytilmoqda, chunki hududni allaqachon timsohlar va pitonlar kabi xavfli hayvonlar o‘rab turgani bildirilgan. Bu loyihani Prezident Donald Trampning immigratsiyaga qarshi siyosati doirasida Florida bosh prokurori faol ilgari surmoqda.
Biroq inson huquqlari faollari va ekologlar ushbu markaz odamlar hayoti uchun xavfli bo‘lishi va atrof-muhitga zarar yetkazishi mumkinligini ta’kidlamoqda. Ular buni “mustaqil va nazoratdan chetda qolgan hibsxona tizimi” sifatida baholamoqda.
Rejalarga ko‘ra, markazdagi ayrim chodirlar allaqachon iyul oyida ishga tushirilishi kutilmoqda.
