Endi sirtqi taʼlim bekor qilindi

O‘zbekistonda sirtqi taʼlim shakli rasman tugatildi. Bu haqda Oliy taʼlim, fan va innovatsiyalar vaziri Qo‘ng‘irotboy Sharipov ma’lum qildi. Uning aytishicha, bu qaror taʼlim sifatining yetarli darajada taʼminlanmagani sababli qabul qilingan.

 

“Ko‘pchilik sirtqida o‘qiyotgan talabalarning asosiy muammosi — ish bilan bandlik va darslarga qatnasha olmaslik. Shu sababli taʼlim sifati susaymoqda. Buni yashirishning hojati yo‘q”, dedi vazir. Endilikda yangi o‘quv yilidan boshlab sirtqi shaklga qabul to‘xtatiladi.

 

Vazirning so‘zlariga ko‘ra, sirtqining o‘rnini masofaviy va uzaytirilgan taʼlim shakllari egallaydi. Masofaviy taʼlimda qat’iy nazorat joriy etiladi — har bir talaba kompyuter orqali darsga kiradi, imtihon paytida esa insonga emas, tizimga taalluqli qoidalar amal qiladi. “O‘rniga kirmoqchi bo‘lganlar yoki ‘shpargalka’ ishlatmoqchi bo‘lsalar, tizim ularni avtomatik ravishda bloklaydi”, — dedi Sharipov.

 

Shu bilan birga, hozirda sirtqida tahsil olayotgan talabalar o‘qishni belgilangan tartibda davom ettiradilar. Ular amaldagi o‘quv dasturlar asosida diplom olish imkoniyatiga ega bo‘lib, ushbu diplomlar boshqa taʼlim shakllari bilan teng huquqli hisoblanadi. Vazir, shuningdek, yangi tizim xalqaro tajribaga asoslanganini, xorijlik professorlar jalb etilayotganini ta’kidladi.