Anomal issiqlik sababli Fransiyada maktablar yopilmoqda
Ekstremal jazirama tufayli Fransiyada mingdan ortiq maktab vaqtincha faoliyatini to‘xtatdi.
Fransiyada davom etayotgan ekstremal issiq havo tufayli 1350 ga yaqin maktab o‘z faoliyatini vaqtincha to‘xtatdi. Bu haqda mahalliy hokimiyat vakillari xabar bergan.
Ta’kidlanishicha, ayrim ta’lim muassasalari to‘liq, boshqalari esa qisman yopilgan bo‘lib, bu choralar bir kunlik vaqtga mo‘ljallangan. Yopilishlar mamlakat bo‘ylab anomal harorat ko‘tarilishi bilan izohlanmoqda.
Fransiyaning rasmiy Meteor-France agentligi 16 ta departamentda, jumladan, Parijda eng yuqori — qizil xavf darajasini e’lon qilgan. Yana 68 ta departamentda esa apelsin (oranjeviy) xavf darajasi kuchda qolmoqda.
Mutaxassislar bugun havo harorati 20°C dan 41°C gacha ko‘tarilishi mumkinligini bildirgan. Issiqlik to‘lqini tufayli avvalgi kuni ham 750 ga yaqin maktab faoliyatini to‘xtatgan edi.
Rasmiylar bu harorat o‘quvchilar va o‘qituvchilar salomatligiga jiddiy xavf tug‘dirishini hisobga olib, maktablarni yopish chorasi eng to‘g‘ri qaror ekanini ta’kidlamoqda.
