Farg‘onada chiqindi uchun 2 mlrd so‘m asossiz pul undirildi
Hozirda ushbu mablag‘larni isteʼmolchilarga qaytarish choralari ko‘rilmoqda.
Joriy yilda Raqobat qo‘mitasi va uning hududiy boshqarmalariga chiqindi tashish xizmati bo‘yicha fuqarolardan ko‘plab norozilik murojaatlari kelib tushganligi sababli chiqindi xizmatlaridan undirilgan jami 2 mlrd so‘mni qaytarish choralari ko‘rilayotgani maʼlum qilindi.
Farg‘ona viloyatining Quva tumanidan tushgan o‘ndan ortiq murojaatlar tahlil qilinganda, xonadondan chiqindi tashib ketilmayotgani, aholining aniq soniga mos ravishda to‘lov belgilanmasligi va xizmatlarning belgilangan grafikda ko‘rsatilmasligi holatlari aniqlangan. 2 nafar fuqaro istiqomat qilayotgan xonadondan chiqindi tashib ketilmagan va bundan tashqari hisob-kitobda 5 kishi uchun haq undirilgan.
MCHJ tomonidan yangi tariflar aholiga o‘z vaqtida eʼlon qilinmagan holda qo‘llanilganligi tufayli 2024–2025 yillar mobaynida Quva tuman filiali tomonidan yuqori tarif qo‘llanilishi natijasida 264 mln so‘mdan ortiq, Farg‘ona shahar filiali tomonidan 17 mln so‘mga yaqin mablag‘lar ortiqcha hisoblanganligi aniqlangan.
Shuningdek, Quva tumanidagi Baynalminal, Jalayer, Iftixor, Katta Qashqar, Mustaqillik, Namuna, Sufi MFYlariga Vazirlar Mahkamasining 2019 yil 6 fevraldagi 95-sonli qaror talablari asosida xizmat ko‘rsatilmaganligi natijasida 1.7 mlrd so‘mdan ziyod ortiqcha mablag‘ hisoblanganligi maʼlum bo‘lgan.
