Niderlandiyada mushakbozlik va petarda yoqish taqiqlanadi
2025-yilgi Yangi yil bayrami fuqarolar uchun petarda va mushakbozlikni yoqishning oxirgi imkoniyati bo‘ladi.
Niderlandiyaning yuqori palatali parlamenti 2026-yildan boshlab xususiy shaxslarga petarda va mushakbozlik mahsulotlarini yoqishni to‘liq taqiqlovchi qarorni ma’qulladi.
Qarorning qabul qilinishiga asosiy sabab — har yili Yangi yil arafasida kuchayadigan zo‘ravonlik holatlari bo‘lgan. Ayniqsa, bu holatlarda politsiya, yong‘in o‘chirish va qutqaruv xizmatlari xodimlariga qarshi hujumlar ortib borayotgani xavotir uyg‘otdi.
Niderlandiyada ushbu masala yillar davomida bahs-munozaraga sabab bo‘lib kelayotgan edi. Tibbiyot xodimlari, huquq-tartibot organlari, hayvonlarni himoya qiluvchi va ekologik tashkilotlar uzoq yillardan beri petardalarni taqiqlashni talab qilib kelgan, biroq parlamentda bu borada yetarli ko‘pchilik ovoz mavjud emas edi. Nihoyat, bu yil ushbu chorani qo‘llab-quvvatlovchilar ustun keldi.
2025-yilgi Yangi yil bayrami fuqarolar uchun petarda va mushakbozlikni yoqishning oxirgi imkoniyati bo‘ladi.
Qo‘shni Germaniyada esa hali bunday to‘liq taqiq yo‘q, ammo jamiyatda bu boradagi bosim ortib bormoqda. 2025-yil 5-yanvarga kelib, Germaniyada petardalarni umumxalq darajasida taqiqlashni talab qilgan petitsiyani 1 million 90 mingdan ortiq odam imzolagan. Petitsiyada aytilishicha, favqulodda xizmat xodimlari Yangi yil kechasida hayoti va sog‘lig‘i bilan xavf ostida qolmoqda, chunki petardalar ularga qarshi qurol sifatida ishlatilmoqda.
