“Samarqand no‘xat sho‘ragi” geografik ko‘rsatkich sifatida rasman ro‘yxatga olindi
Bu orqali o‘zbek milliy taomlarining yana bir namoyandasi rasman e’tirof etildi va huquqiy himoyaga olindi.
Adliya vazirligi mazkur milliy taomni rasmiy tarzda geografik ko‘rsatkich sifatida davlat reyestriga kiritdi.
O‘zbek milliy oshxonasi durdonalaridan biri bo‘lgan, o‘ziga xos ta’mi, go‘shti va noni bilan ajralib turuvchi “Samarqand no‘xat sho‘ragi” endilikda huquqiy maqomga ega bo‘ldi.
2025-yil 3-iyul kuni Adliya vazirligi ushbu taomni geografik ko‘rsatkich sifatida davlat ro‘yxatiga kiritdi. Bu haqda “Adliya xabari” rasmiy axborotida e’lon qilindi.
Ma’lumot o‘rnida: Geografik ko‘rsatkich — bu ma’lum bir hudud yoki joy bilan bog‘liq mahsulot yoki taomning sifat va kelib chiqishini ifodalovchi belgi hisoblanadi.
“Samarqand no‘xat sho‘ragi”ga bunday maqom berilishi bejiz emas, sababi:
• Unda go‘sht va ilikli sho‘rvalar uyg‘unligi mavjud;
• Taom tayyorlashda maxsus 1–2 soat xona haroratida quritilgan Samarqand noni ishlatiladi;
• Eng asosiysi, bu taom qadimdan faqat Samarqand shahriga xos bo‘lgan an’anaviy usulda pishiriladi.
Geografik ko‘rsatkich huquqini tasdiqlovchi rasmiy hujjat Samarqand viloyati adliya boshqarmasi boshlig‘i Salohiddin Sattorov tomonidan viloyat hokimi v.b. Adiz Boboyevga topshirildi.
Eslatma: Geografik ko‘rsatkichlarni ro‘yxatdan o‘tkazish va ularni huquqiy muhofaza qilish bo‘yicha yagona vakolatli organ — O‘zbekiston Respublikasi Adliya vazirligi hisoblanadi.
