Tesla kompaniyasi savdosi iyun oyida keskin oshdi
Elektr avtomobillar bozori tiklanish jarayonida ekani ta'kidlanmoqda.
Tesla kompaniyasi iyun oyida Buyuk Britaniyada 7 719 dona avtomobil sotib, o‘tgan yilga nisbatan savdosini 14% ga oshirdi. Bu ko‘rsatkich elektr avtomobillar bozoridagi umumiy tiklanish jarayonida qayd etildi, deya xabar bermoqda Reuters.
Britaniya Avtomobil Ishlab Chiqaruvchilari va Sotuvchilari Jamiyati (SMMT) hisobotiga ko‘ra, iyun oyida mamlakatda yangi avtomobillar ro‘yxatdan o‘tkazilishi 6,7% ga, elektr avtomobillar savdosi esa 39% ga oshib, 47 354 donaga yetgan.
Shunga qaramay, yil boshidan buyon Teslaning umumiy savdosi Britaniyada deyarli 2% ga pasaygan. Bu orada Xitoyning BYD kompaniyasi 2 498 dona avtomobil sotiq bilan to‘rt barobar o‘sishga erishdi.
Deloitte eksperti Jeymi Xemilton EV bozorining izchil o‘sishi uchun zaryadlash infratuzilmasining kengaytirilishi muhimligini qayd etdi. Auto Motive nashrining yozishicha, Ford kompaniyasining elektr avtomobillari savdosi yilning birinchi yarmida to‘rt barobar oshgan.
