Yaponiyadagi jazirama choy bozorini larzaga soldi
Issiqlik yashil choy hosiliga putur yetkazdi – narxlar rekord darajada ko'tarildi.
Yaponiya meteorologiya agentligi ma’lumotlariga ko‘ra, 2024-yil 1898-yildan beri qayd etilgan eng issiq yilga aylandi. Issiqlik nafaqat insonlar salomatligiga, balki choy plantatsiyalariga ham katta zarar yetkazgan.
RBK xabariga tayangan holda point.md nashrining ma'lum qilishicha, g‘ayritabiiy harorat tufayli Kyoto va Aichi prefekturalarida joylashgan choy plantatsiyalarining hosildorligi keskin kamaygan. Aynan shu hududlar Yaponiyada eng ko‘p matcha ishlab chiqariladigan joylar hisoblanadi. Kyoto o‘zi mamlakatdagi barcha matcha choyining chorak qismini yetishtiradi.
Oltinchi avlod matcha ishlab chiqaruvchisi Masahiro Yoshida bu yil bor-yo‘g‘i 1,5 tonna hosil olganini aytmoqda — bu odatdagi 2 tonnalik yillik ko‘rsatkichdan 25 foiz kam.
Biroq ichki va xalqaro bozorda choyga talab 10 barobarga oshgan. Natijada, 2024-yilda Yaponiyadan yashil choy eksporti 25 foizga ko‘tarilib, 252 million dollarga yetgan. Narxlar ham rekord darajaga chiqdi: may oyida Kiotoda matcha narxi 1 kg uchun 8000 iyenani (55 dollardan ortiq) tashkil etdi, bu esa 2016-yilgi rekorddan 170 foiz yuqori.
Shunga qaramay, tanqislik muammosini tezda hal qilish oson emas. Ekspertlarga ko‘ra, yangi plantatsiyalarni barpo etish va hosil olish uchun kamida besh yil vaqt kerak bo‘ladi.
Issiq ob-havo nafaqat choy ishlab chiqarishga, balki inson salomatligiga ham salbiy ta’sir ko‘rsatdi. 2024-yilning iyul oyi Yaponiya tarixidagi eng issiq oy bo‘ldi. Faqatgina Tokioning o‘zida jazirama oqibatida 123 kishi vafot etdi, mamlakat bo‘yicha esa 1,200 dan ortiq odam issiqlik zarbasidan jabrlandi.
