Erdo'g'an keyingi prezidentlik saylovlarida qatnashmaydimi?
Tarqalayotgan xabarlar yuzasidan Turkiyaning O‘zbekistondagi elchixonasi Zamon.uz ga aniq maʼlumot berdi.
So‘nggi kunlarda ijtimoiy tarmoqlarda Turkiya prezidenti Rajab Toyyib Erdo'g'an keyingi prezidentlik saylovlarida qatnashmasligini e’lon qilgani haqidagi videolar tarqaldi. Hatto, ayrim foydalanuvchilar Erdog‘on yig‘lab nutq so‘zlaganini saylov bilan bog‘lab sharhlashdi. Holat yuzasidan Zamon.uz Turkiyaning O‘zbekistondagi elchixonasi bilan bog‘landi va xabarlarga aniqlik kiritdi.
Elchixona vakillarining ma’lum qilishicha, bunday xabarlar yolg‘on bo‘lib, Turkiya Prezidenti keyingi saylovlardagi ishtiroki haqida hech qanday bayonot bermagan. Ijtimoiy tarmoqlarda tarqalgan videolar esa aslida prezidentning terrorizmga qarshi kurash masalasiga bag‘ishlangan yig‘ilishdagi chiqishidan olingan. Erdog‘on yig‘ilishda so‘nggi yillarda terrorchilik harakatlari oqibatida halok bo‘lgan turk askarlarini eslab, hayajonlangan holda nutq so‘zlagan. Aynan shu holat ayrim internet foydalanuvchilari tomonidan noto‘g‘ri talqin qilingan va bu videolar “saylovdan chekinish” sifatida tarqatila boshlangan.
Turkiya elchixonasi fuqarolardan yolg‘on xabarlarga ishonmaslikni va ularni tarqatmaslikni so‘rab qoladi.
