Navoiyda tomorqasida giyohvandlik o‘simliklarini yetishtirgan shaxslar ushlandi
Xatirchi tumanida 23 kg 300 gr marixuana va Navbahorda 19 tup kanabis topildi.
Navoiy viloyatining Xatirchi va Navbahor tumanlarida istiqomat qiluvchi ikki nafar fuqaroning tomorqa hududida yirik miqdorda giyohvandlik o‘simliklari yetishtirayotgani aniqlandi. Bu haqda viloyat IIB axborot xizmati rahbari Fayoz Qosimov ma’lum qildi.
Xususan, Xatirchi tumanining Dehqonobod mahallasida yashovchi, 50 yoshli erkak fuqaro daromad orttirish maqsadida tomorqasida marixuana o‘simligini yetishtirib kelgani aniqlangan. O‘tkazilgan nazorat tadbirlari davomida uning tomorqasidan 168 tup ho‘l holatdagi giyohvand o‘simlik, jami 23 kg 300 gramm marixuana, shuningdek, hovlisidagi qopdan 45 gramm, tomorqa o‘simliklari orasidan esa 215 gramm quritilgan giyohvand modda aniqlanib, hujjatlashtirilgan.
Bundan tashqari, Navbahor tumanining Chorvoqguzar mahallasida yashovchi ayol ham xonadoni hovlisida 19 tup kanabis parvarishlab kelayotgani aniqlangan. Har ikki holatda ham moddiy dalillar holislar ishtirokida rasmiylashtirib olingan.
Hozirda mazkur holatlar yuzasidan O‘zbekiston Respublikasi Jinoyat kodeksining tegishli moddalari asosida jinoyat ishi qo‘zg‘atilib, tergov harakatlari olib borilmoqda.
