Toshkentdan yana bir qator masʼullar Angrenda zo‘ravonlikka uchragan qiz oldiga bordi
Holat yuzasidan boshlangan tergov jarayoni Bosh prokuratura tomonidan alohida nazoratga olingan.
Angren shahrida 15 yoshli voyaga yetmagan Y.S. ismli qiz bilan bog‘liq holat jamoatchilikda keng muhokamalarga sabab bo‘ldi. Ijtimoiy himoya milliy agentligi holat yuzasidan rasmiy bayonot berib, bola yolg‘iz emasligi, davlat uning yonida ekanini ma’lum qildi.
Agentlik tashabbusi bilan holat o‘rganildi. Jarayonda huquqni muhofaza qiluvchi organlar, Bosh prokuratura, Sog‘liqni saqlash vazirligi va vasiylik organlari vakillari ishtirok etdi. Oila a’zolari, shifokorlar va psixologlar bilan suhbatlar o‘tkazilib, vaziyatga har tomonlama baho berildi.
Mutaxassislar tavsiyasiga binoan, Y.S. Toshkent shahridagi ixtisoslashtirilgan tibbiy muassasaga ko‘chirildi. Bu yerda yetakchi mutaxassislardan iborat shifokorlar konsiliumi uning davolash rejasini ishlab chiqdi. Shuningdek, qizning ruhiy holatiga ham alohida e’tibor qaratilib, psixologik yordam ko‘rsatilmoqda.
Agentlik qiz va uning oilasiga to‘liq sog‘ayish jarayonida har tomonlama hamrohlik qilishini bildirdi. Shu bilan birga, ushbu ish yuzasidan tergov jarayoni Bosh prokuratura tomonidan alohida nazoratga olingan. Barcha zarur protsessual harakatlar davom etmoqda.
Eslatib o‘tamiz, avvalroq Bolalar ombudsmani Toshkent viloyatining Angren shahrida bo‘lib, jinoyatdan jabrlangan qiz bilan uchrashgan va vaziyatni o‘rgangan edi.
