Konibodomdagi qotilliklar ishi bo‘yicha to‘rt kishi umrbod qamoq jazosiga hukm qilindi
2024 yilda 7 oilaning 23 a’zosi vahshiylarcha o‘ldirilgani bo'yicha sud hukmi e’lon qilindi.
Tojikistonning Konibodom shahrida yuz bergan dahshatli qotilliklar ishi bo‘yicha to‘rt nafar shaxs umrbod ozodlikdan mahrum etildi. Bu haqda Davron Zoxidzoda jurnalistlar bilan uchrashuvda ma’lum qildi.
Zoxidzodaning so‘zlariga ko‘ra, Konibodom va unga yaqin hududlarda sodir bo‘lgan ko‘plab odam o‘limi bo‘yicha to‘rt nafar shaxsga nisbatan umrbod qamoq jazosi tayinlangan. Biroq u hukm qachon chiqarilgani va sud tafsilotlari haqida aniqlik kiritmagan.
Oldinroq berilgan ma’lumotlarga ko‘ra, 2024-yilning mart oyidan dekabr oyigacha bo‘lgan davrda 7 ta oiladan jami 23 kishi shafqatsizlarcha o‘ldirilgan.
28–29 mart kunlari bir oiladan 5 kishi, 16–17 aprel kunlari 2 kishi, 28–29 may kunlari esa ikkita oiladan 6 kishi o‘ldirilgan. Dekabr oyida yana ikkita dahshatli holat ro‘y bergan: 8–9 dekabr kunlari 6 kishi, 15–16 dekabr kunlari esa yana ikkita oiladan 4 kishi vahshiylarcha o'ldirilgan. Jabrlanganlar orasida bolalar, qariyalar va turli yoshdagi ayollar ham bo‘lgan.
Ba’zi holatlarda gumonlanuvchilarning yaqinlari ularning aybsizligini da’vo qilib, ishni qayta ko‘rib chiqishni talab qilgan.
Bu voqealar jamoatchilik orasida keng tahlika uyg‘otgan. Odamlar kechalari mahallalarda navbatchilik qilib, xavfsizlikni ta’minlashga harakat qilganlar.
