Xalqaro qidiruv va Gruziyadagi hibs: o‘zbekistonlik ayol Qozog‘istonga ekstraditsiya qilindi
U uyushgan jinoiy guruhda ishtirok etish va qo‘shmachilikda gumonlanmoqda.
Transmilliy uyushgan jinoyatchilik guruhida ishtirok etish va qo‘shmachilikda gumonlangan O‘zbekiston fuqarosi Gruziyadan Qozog‘istonga ekstraditsiya qilindi. Bu haqda Qozog‘iston Bosh prokuraturasiga tayanib, KazTAG xabar berdi.
Ma’lum qilinishicha, ayol Qozog‘iston Ichki ishlar vazirligi, Bosh prokuratura va Interpol xodimlari tomonidan Qozog‘istonning Gruziyadagi elchixonasi ko‘magida mamlakatga qaytarilgan.
Tergov ma’lumotlariga ko‘ra, u uyushgan jinoiy guruhning boshqa a’zolari bilan birgalikda fohishalik va boshqa jinsiy xizmatlar ko‘rsatuvchi shaxslardan Kyzdar.net saytida akkauntlarini to‘ldirish uchun mablag‘ qabul qilgan. Bu pullar ularning jinsiy xizmatlarini reklama qilish va targ‘ib etishga yo‘naltirilgan.
Guruh a’zolari kelib tushgan mablag‘lardan komissiya ushlab qolib, qolgan qismini sayt tashkilotchilariga o‘tkazgan. Shu tariqa noqonuniy qo‘shmachilik sxemasi faoliyati ta’minlangan.
Qozog‘iston Bosh prokuraturasi ma’lumotiga ko‘ra, guruhning ayrim a’zolari allaqachon turli muddatlarga ozodlikdan mahrum qilingan. Boshqalari, jumladan, mazkur ayol ham jinoiy javobgarlikdan qochib, xalqaro qidiruvga berilgan.
Gumonlanuvchi joriy yil iyul oyida Gruziyada qo‘lga olingan va Qozog‘iston Bosh prokuraturasi so‘roviga binoan ekstraditsiya qilingan. Hozirda u sudgacha bo‘lgan tergov doirasida hibsda saqlanmoqda.
Qozog‘iston qonunchiligiga ko‘ra, ayblanayotgan jinoyatlari uchun mol-mulkni musodara qilish bilan birga 10 yilgacha ozodlikdan mahrum etish jazosi nazarda tutilgan.
