60 ming imzo to‘plandi: Japarov prezidentlikka nomzod sifatida ro‘yxatdan o‘tadimi?
Uning nomzodini ro‘yxatga olish bo‘yicha yakuniy qarorni Markaziy saylov komissiyasi qabul qiladi.
Qirg‘izistonning amaldagi prezidenti Sadir Japarov navbatdagi prezidentlik saylovida ishtirok etish uchun 60 ming saylovchining imzosini to‘pladi. Bu nomzodni ro‘yxatga olish uchun talab etiladigan eng kam ko‘rsatkichdan ikki baravar ko‘p.
Qirg‘iziston Markaziy saylov va referendumlar komissiyasi ma’lumotlariga ko‘ra, Japarov imzo to‘plashning belgilangan maksimal soniga erishgan. Prezidentlikka nomzod ro‘yxatdan o‘tishi uchun kamida 30 ming saylovchining qo‘llab-quvvatlashini olishi kerak.
Imzolar an’anaviy shaklda hamda “Tunduk” davlat portali orqali elektron tarzda yig‘ilmoqda. Biroq belgilangan miqdordagi imzolarni to‘plash nomzodning avtomatik ravishda ro‘yxatdan o‘tishini anglatmaydi. Yakuniy qaror Markaziy saylov komissiyasi hujjatlarni tekshirishi va qonunchilikdagi barcha talablar bajarilganini tasdiqlashidan so‘ng qabul qilinadi.
Sadir Japarov 10-noyabr kuni o‘z nomzodini ilgari surgan. Nomzodlarni ko‘rsatish jarayoni 13-noyabrgacha davom etadi.
Qirg‘izistonda prezidentlik saylovlari 2027-yil 27-yanvar kuni bo‘lib o‘tishi belgilangan.
