“Omadsiz” — Tramp Medvedovga “tashlandi”. Rossiya rasmiysi esa AQSH prezidentini qo‘rqitmoqda
Rossiya sobiq prezidenti Dmitriy Medvedev va Donald Tramp bir-biriga nisbatan keskin chiqish qildi
Rossiya Xavfsizlik Kengashi raisi o‘rinbosari, mamlakatning sobiq prezidenti Dmitriy Medvedev yaqinda Rossiyaga nisbatan ikkilamchi sanksiyalar joriy qilinsa, Qo‘shma Shtatlarga qarshi urush ochish bilan tahdid qilgan edi.
"Menga Hindiston Rossiya bilan nima qilayotgani mutlaqo ahamiyatsiz. Ular o‘sha o‘lik iqtisodiyotlarini birga cho‘ktiraversinlar — menga baribir. Biz Hindiston bilan juda kam hamkorlik qilamiz. Xuddi shuningdek, Qo‘shma Shtatlar Rossiya bilan ham deyarli hech qanday hamkorlik qilmaydi. O‘zini hanuz Rossiya prezidenti deb hisoblaydigan omadsiz, sobiq prezident Medvedevga yetkazing, gaplarini o‘ylab gapirsin. U juda xavfli hududga kirib kelyapti," — deb yozdi AQSH prezidenti Truth Social ijtimoiy tarmog‘idagi sahifasida.
Shundan so‘ng, Medvedev Trampning ushub bayonotiga javob qaytarib, Oq uy rahbariga “O‘lik qo‘l” bilan tahdid qildi
Rossiya Xavfsizlik Kengashi raisining o‘rinbosari "Jahldor Trampning asabiy reaksiyasi Rossiya har tomonlama haq ekani va o‘z yo‘lida davom etishini anglatadi", — deb yozdi sahifasida.
Shuningdek, mojaroli postlari bilan tanilgan Medvedev AQSH prezidentiga “O‘lik qo‘l” qanchalik xavfli bo‘lishi mumkinligini" eslatib o‘tdi.
Maʼlumot uchun, “O‘lik qo‘l” deb Sovet Ittifoqida “Sovuq urush” davrida ishlab chiqilgan “Perimetr” nomli avtomatlashtirilgan yadroviy javob tizimi ataladi. Bu tizim mamlakat rahbariyati yo‘q qilingan va buyruq markazlari bilan aloqa uzilgan taqdirda, ommaviy yadro zarbasini avtomatik tarzda amalga oshirishi uchun yaratilgan.
