Tojikistonda folbin va sehrgarlarga borganlar jarima to'laydi
Agar shaxs bir yil ichida folbinlik yoki sehrgarlik bilan qayta shug‘ullansa, bu jinoyat sifatida baholanadi.
Tojikistonda endi folbin va sehrgarlik xizmatlaridan foydalangan fuqarolar ma’muriy javobgarlikka tortiladi. Dushanbe shahar Ichki ishlar boshqarmasi ma’lum qilishicha, ma’muriy huquqbuzarliklar to‘g‘risidagi kodeksga kiritilgan yangi qo‘shimchalar bilan bunday amaliyotga jalb qilinganlarga jarima solish tartibi joriy etilgan.
Yangi qoidalarga ko‘ra, folbin yoki sehrgarga murojaat qilgan shaxslarga hisoblash ko‘rsatkichining 50 (3 750 somoni)dan 60 (4 500 somoni) barobarigacha jarima solinadi. Ichki ishlar organlari fuqarolardan qonunbuzarlikdan tiyilishni so‘rab, bu kabi holatlarning oldini olishda politsiya bilan hamkorlik qilishni tavsiya qilmoqda.
Amaldagi qonunchilikka muvofiq, agar shaxs bir yil ichida folbinlik yoki sehrgarlik bilan qayta shug‘ullansa, bu jinoyat sifatida baholanadi. Shu bilan birga, tegishli modda bo‘yicha qanday jazo chorasi qo‘llanishi aniq belgilanmagan.
Tojikistonda folbin va sehrgarlarga qarshi muntazam reydlar o‘tkaziladi, bu esa jamiyatni noqonuniy amaliyotlardan himoya qilish va fuqarolarni ogohlantirishga qaratilgan chora sifatida ko‘rilmoqda.
