Toshkentdagi klinikada 9 yoshli bola jarrohlik amaliyoti paytida vafot etdi
Rinoplastika jarrohligi chog‘ida ro‘y bergan fojiadan so‘ng prokuratura tekshiruv boshlagan.
Toshkent shahridagi xususiy klinikalardan birida 9 yoshli bola jarrohlik amaliyoti paytida hayotdan ko‘z yumdi. Ma’lumotlarga ko‘ra, bola bir hafta avval klinikada tibbiy ko‘rikdan o‘tgan va 25-avgust kuni burun sohasida rinoplastika amaliyoti qilingan. Afsuski, bola operatsiyadan so‘ng hushiga kelmay, vafot etgan. Bu haqda Zamon.uz’ga Bosh prokuratura matbuot kotibi Hayot Shamsuddinov ma'lum qildi.
Toshkent shahri prokuraturasi hodisa yuz berganini tasdiqladi va voqea yuzasidan tergovga qadar tekshiruv boshlanganini ma’lum qildi.
Rasmiy ma’lumotga ko‘ra, 2016 yilda tug‘ilgan bemor bilan bog‘liq ushbu holat yuzasidan hozirda Mirzo Ulug‘bek tumani prokuraturasi tomonidan tekshiruv ishlari olib borilmoqda.
Prokuratura tekshiruv jarayoni har tomonlama, to‘liq va xolisona olib borilishini, yakunida qonuniy qaror qabul qilinishini ta’kidladi.
