Afg‘onistonda to‘y marosimlariga qat’iy cheklovlar joriy etildi
Tolibon rahbari Xaybatulloh Oxundzoda yangi qoidalarni tasdiqladi.
Afg‘onistonda “Tolibon” muvaqqat hukumati rahbari Xaybatulloh Oxundzoda yangi farmon chiqardi. Unga ko‘ra, an’anaviy to‘y marosimlarining qator elementlari “islomiy me’yorlarga zid” va “moliyaviy jihatdan og‘ir yuk” sifatida baholanib, qat’iy cheklovlar belgilandi.
Yangi qoidalarga binoan, haddan tashqari ko'p qalin puli to‘lash, to‘y oldidan yoki keyin ziyofatlar uyushtirish, qimmatbaho sovg‘alar berish, shuningdek, bir yil davomida bir martadan ko‘proq sovg‘a ulashish taqiqlanadi. Davlatga tegishli transport vositalaridan to‘ylarda foydalanish ham butunlay man qilindi.
Farmonga ko‘ra, “bоdal” — qiz almashish orqali nizolarni hal qilish amaliyoti, shuningdek, to‘ylarda havoga o‘q uzish, xavfli avtomobil haydash va sovg‘a yutish tanlovlari ham bekor qilindi. Kelinning to‘yidan keyingi “ronamoy” sovg‘alari ham endi berilmaydi.
Tolibon ma’muriyati yangi qoidalar orqali to‘ylarni kamtarona, kuyovning imkoniyatlariga mos tarzda o‘tkazishni maqsad qilmoqda. Farmonda to‘y marosimlarini ortiqcha dabdabasiz, fotiha va nikohdan ko‘p o‘tmay o‘tkazish majburiyligi ham ta’kidlangan.
