Surxondaryoda qo‘shxotinli bo‘lgan erkak 34 mln jarima to‘ladi
U shuningdek axloq tuzatish ishlariga mahkum etilgan.
Muzrabot tumanida yashovchi fuqaro M.B. qonunni yaxshi bilsa-da, oilali bo‘lishiga qaramasdan ikkinchi ayolni uyiga olib kelib, u bilan er-xotin sifatida yashay boshladi. Bu harakat, tabiiyki, uning asli turmush o‘rtog‘iga og‘ir zarba bo‘ldi.
Ayol qancha qarshilik qilmasin, fuqaro M.B. tomonidan doimiy bosim va zo‘ravonlikka duch keldi. Voqeadan xabardor bo‘lgan huquqni muhofaza qiluvchi organlar ishni sudga oshirdi.
Sud hukmiga ko‘ra, fuqaro M.B. axloq tuzatish ishlariga mahkum etilib, 37 million 500 ming so‘m miqdorida jarima to‘lashga majbur qilindi.
Ammo u jarimani ixtiyoriy ravishda to‘lamadi. Shundan so‘ng, Majburiy ijro byurosi ishga kirishdi. fuqaro M.B.ning “Malibu” rusumli avtomashinasi xatlovga olindi va qarz so‘ndirilmasa, auksion orqali sotilishi haqida ogohlantirildi.
Mashinasidan ayrilish xavfini his etgan fuqaro M.B. “mol achchig‘i jon achchig‘i” degan gapning maʼnosini yaxshi tushundi — bir kunda barcha jarimani hamda ijro yig‘imini to‘lab berdi.
