Eronda ayollar huquqlarini himoya qilgan Nobel tinchlik mukofoti sovrindori hibsga olindi

 

Inson huquqlari faoli, ayollar huquqlarini himoya qilgani uchun 2023-yilda Nobel tinchlik mukofotiga sazovor bo‘lgan Narges Mohammadiy Eron xavfsizlik kuchlari tomonidan Mashhad shahrida hibsga olindi deb xabar berdi kazinform.

 

53 yoshli ayol boshqa inson huquqlari himoyachilari bilan birga o‘tgan hafta vafot etgan advokat Xosrov Alikordi xotirasiga bag‘ishlab o‘tkazilgan marosim chog‘ida qo‘lga olingan. Guvohlarning ma’lumotlariga ko‘ra, tadbir davomida ishtirokchilar hukumatga qarshi shiorlar aytishgan.

 

Nobel qo‘mitasi yuzaga kelgan vaziyat yuzasidan chuqur tashvish bildirdi hamda Eron rasmiylarini Narges Mohammadining qayerda ekanini zudlik bilan aniqlashga, uning xavfsizligini ta’minlashga va uni hech qanday shartsiz ozod qilishga chaqirdi.

 

Eron rasmiylari hozircha ushbu holat bo‘yicha rasmiy bayonot bermagan.

 

Ma’lumotlarga ko‘ra, Narges Mohammadi 2016-yilda o'lim jazosiga qarshi inson huquqlari harakatiga rahbarlik qilgani uchun 16 yilga ozodlikdan mahrum qilingan. 2024-yil dekabr oyida u tibbiy sabablarga ko'ra vaqtincha ozod qilingan. Uning turmush o‘rtog‘i Tagi Rahmoni hibs jarayoni zo‘ravonlik bilan amalga oshirilganini bildirgan hamda xalqaro hamjamiyatni vaziyatga aralashishga chaqirgan.

 

Xalqaro Amnistiya tashkilotiga ko'ra, Muhammadiy hibsda qiynoqqa solingan va bir necha bor yurak xurujiga uchragan.

 

Xalqaro inson huquqlari tashkilotlari mazkur hodisa yuzasidan mustaqil tergov o‘tkazishga va Eronda inson huquqlari holati ustidan monitoringni kuchaytirishga chaqirmoqda.