Saudiya Arabistoni valiahd shahzodasi “Barselona”ni sotib olishi mumkin
U futbol klubini sotib olish uchun 10 milliard yevro taklif qilishni rejalashtirmoqda.
Saudiya Arabistoni valiahd shahzodasi Muhammad bin Salmon Ispaniyaning “Barselona” futbol klubini sotib olish bo‘yicha yirik taklif bilan chiqishi mumkin.
Jurnalist Fransua Gallardoning ijtimoiy tarmoqlardagi maʼlumotiga ko‘ra, valiahd shahzoda klubni xarid qilish uchun 10 milliard yevro miqdorida taklif kiritishni rejalashtirmoqda deb xabar berdi Oxu.Az nashri.
Xabarlarga ko‘ra, “Barselona” klubini boshqaruvchi rahbariyat aʼzolari mazkur oldi-sotdi bitimini maʼqullamasligi va jarayonni to‘xtatib qo‘yishi mumkin.
Goal nashrining yozishicha, Saudiya Arabistonining Davlat investitsiya jamg‘armasi klubning ayrim tijorat bo‘linmalariga investitsiya kiritish variantini ham ko‘rib chiqmoqda.
Qayd etilishicha, hozirgi vaqtda Kataloniya klubining umumiy qarzdorligi 2,5 milliard yevroni tashkil etadi.
