Prezident Shavkat Mirziyoyev Kallibek Kamalov vafoti munosabati bilan hamdardlik bildirdi
“Atoqli davlat va jamoat arbobi, yoshlarning mehribon ustozi, samimiy va kamtarin inson Kallibek Kamalovning xotirasi qalblarimizda doimo saqlanib qoladi”, deyiladi hamdarlikda.
Prezident Shavkat Mirziyoyev Oʻzbekistonning atoqli davlat va jamoat arbobi, mehnat faxriysi Kallibek Kamalovning vafoti munosabati bilan chuqur hamdardlik bildirdi. Kallibek Kamalov 11-fevral kuni 100 yoshida olamdan oʻtdi.
Kallibek Kamalov 1926-yil 18-martda Qoraqalpogʻistonning Taxtako‘pir tumanida tug‘ilib, mehnat faoliyatini yoshlar qo‘mitasi kotibi lavozimidan boshlagan. Keyinchalik Vazirlar Kengashi raisining oʻrinbosari, Nukus shahar ijroiya qo‘mitasi raisi, Qoraqalpog‘iston Respublikasi kommunal xo‘jaligi va yo‘l transporti vaziri, Qoraqalpog‘iston partiya qo‘mitasi kotibi lavozimlarida samarali faoliyat olib borgan.
1959–1963-yillarda Qoraqalpog‘iston Respublikasi Vazirlar Kengashi raisi, 1963–1984-yillarda esa partiya qo‘mitasining birinchi kotibi sifatida hududni ijtimoiy-iqtisodiy rivojlantirish va sohalarni zamon talablari asosida yo‘lga qo‘yish bo‘yicha ulkan ishlarni amalga oshirgan. 1984–1986-yillarda esa diplomat sifatida samarali faoliyat koʻrsatgan.
Uning rahbarligi va fidoyiligi natijasida paxtachilik, g‘allachilik, chorvachilik, sanoat va ishlab chiqarish tarmoqlari rivojlanib, aholining turmush darajasi yaxshilandi. So‘nggi yillarda K.Kamalov nuroniylar jamoatchilik kengashi raisi sifatida keksalarni qo‘llab-quvvatlash, yoshlarni Vatanga muhabbat va milliy qadriyatlarga hurmat ruhida tarbiyalash borasida faol ishlagan.
Kallibek Kamalov “Shuhrat” medali va “El-yurt hurmati” ordeni bilan taqdirlangan. Uning xotirasi qalblarimizda doimo saqlanib qoladi.
