Toshkentdagi “kvartira”da kimyogar talabalar narkolaboratoriya tashkil etdi

 

Toshkent shahar Mirzo Ulug‘bek tumanida tezkor tadbir o‘tkazilgani natijasida 2007-yilda tug‘ilgan qiz va 2003-yilda tug‘ilgan talaba yigit ijarada yashaydigan xonadonda sintetik giyohvandlik vositalari tayyorlangan narkolaboratoriya tashkil etgani aniqlandi. Bu haqda Toshkent shahar IIBB matbuot xizmati xabar berdi.

 

Maʼlum bo‘lishicha, mazkur shaxslar 2025-yil sentabr oyidan buyon Telegram orqali narko do‘kon kuratrlari topshiriqlari asosida sintetik giyohvandlik moddalarini tayyorlab kelgan. Tezkor tadbirda laboratoriyadan 1 kg mefedron va unda qo‘llangan asbob-uskunalar ashyoviy dalil sifatida olindi.

 

Qo‘lga olingan talaba yigitning mobil telefonidan olingan geolokatsiya maʼlumotlari orqali Yangihayot tumanidagi dala maydonida “zakladka” usulida ko‘mib qo‘yilgan yana 1 kg sintetik giyohvandlik vositalari topilgan. Davom ettirilgan tezkor qidiruv tadbirlari natijasida Toshkent shahri hududidagi sintetik giyohvandlik vositalari tarqatilishida ishtirok etgan 9 nafar zakladchik ham ushlangan. Ularning uch nafari poytaxtning nufuzli oliy taʼlim muassasalari talabalari bo‘lgan. Qolgan 6 nafar shaxs orasida oilaviy faoliyat bilan shug‘ullanib kelayotganlar ham bor.

 

Tezkor tadbirlar natijasida umumiy 2 kg sintetik giyohvandlik vositalari (10 ming dozaga teng) tarqalishi oldi olindi.

 

Hozirda ushbu jinoiy guruh aʼzolariga nisbatan O‘zbekiston Respublikasi Jinoyat kodeksining 273-moddasi 3-qismi “b” bandi bilan jinoyat ishi qo‘zg‘atilgan va tergov harakatlari olib borilmoqda.