Farg‘onada rossiyalik pensionerlarni millionlab rublga aldagan 34 kishilik jinoiy guruh fosh etildi

 

Davlat xavfsizlik xizmati Farg‘ona viloyati boshqarmasi va boshqa huquqni muhofaza qiluvchi idoralar hamkorligida o‘tkazilgan tezkor-qidiruv tadbirlari natijasida xalqaro miqyosda katta miqdorda pul mablag‘larini firibgarlik yo‘li bilan o‘zlashtirgan 34 kishilik tashkilotli jinoiy guruh fosh qilindi. Bu haqda DXX Zamon.uzga xabar berdi.

 

Farg‘ona shahrida yashovchi 40 yoshli fuqaro rahbarlik qilgan guruh Farg‘ona va Toshkent shaharlari hududida binolarni ijaraga olib, “Call-markaz” niqobi ostida faoliyat yuritgan. Ular axborot texnologiyalari vositasida Rossiya Federatsiyasida dori vositalari va biologik faol qo‘shimchalar savdosi bilan shug‘ullanuvchi tashkilotlarning 70 mingdan ortiq mijozlari to‘g‘risidagi ma’lumotlarni qo‘lga kiritgan.

 

Shundan so‘ng, guruh a’zolari SIP telefoniya va Zoiper ilovalari orqali asosan keksaygan fuqarolarga qo‘ng‘iroq qilib, o‘zlarini huquqni muhofaza qiluvchi organlar va bank xodimlari sifatida tanishtirib, noto‘g‘ri tarzda kompaniya tomonidan sifatsiz mahsulotlar sotilgani va ularga kompensatsiya to‘lanishi lozimligini aytgan. Jabrlanuvchilarni 5 mingdan 20 ming rubgacha miqdorda soliq to‘lashga ishontirgan va natijada ular turli bank plastik kartalari orqali jami 9.599.561 rubllik mablag‘ni o‘tkazib bergan.

 

Shuningdek, jinoiy guruhning 3 nafar a’zosi cryptocurrency savdosi bilan shug‘ullanish huquqini beruvchi ruxsatsiz faoliyat olib borib, 470 ming AQSH dollaridan ortiq mablag‘ aylanmasini amalga oshirgan. Bu Prezident qarori va cryptocurrency faoliyatini tartibga soluvchi qonun talablariga zid hisoblanadi.

 

Jinoiy ishlar bo‘yicha Yozyo‘von tuman sudi tomonidan guruh a’zolarining tegishliligi bo‘yicha Jinoyat kodeksining 168, 243, 278-7 va 278-8 moddalariga muvofiq hukm chiqarilib, ularning 21 nafari 3 yil 6 oydan 9 yil 6 oygacha ozodlikdan mahrum qilindi. Qolgan 13 nafar shaxs 4 yil 3 oydan 4 yil 6 oyga qadar ozodlikni cheklash jazosiga tortildi. Ularga jarimalar ham qo‘llanildi.

 

Jabrlanuvchilarga yetkazilgan moddiy zarar undirilib beriladi.