Qo‘qondagi uyda ham portlash yuz berdi. Qurbon bor
Portlash oqibatida 4 kishi shahar tibbiyot birlashmasiga yotqizilgan.
16-fevral kuni soat 21:18 da Qo‘qon shahrida joylashgan Muqimiy ko‘chasidagi ko‘p qavatli uyda yong‘in sodir bo‘lgani haqida “112” tizimi orqali Farg‘ona viloyati Favqulodda vaziyatlar boshqarmasiga xabar kelib tushgan. Bu haqda FVB matbuot xizmati xabar berdi.
Yong‘in-qutqaruv ekipajlari hodisa joyiga soat 21:23 da yetib borgan. Yong‘in 21:25 da o‘rab olinib, 21:32 da to‘liq bartaraf etilgan.
Dastlabki ma’lumotlarga ko‘ra, hodisa gaz va havo aralashmasining chaqnashi oqibatida yuzaga kelgan. Yong‘in natijasida 28-uyda taxminan 50 kvadrat metr maydonda tom va shift qismi hamda uy jihozlari zararlangan.
Chaqnash oqibatida 4 nafar fuqaro turli darajada kuyish tan jarohatlari olib, shahar tibbiyot birlashmasiga yotqizilgan. Ko‘rsatilgan tibbiy yordamga qaramasdan, 1 nafar fuqaro vafot etgan.
Ayni paytda hodisaning kelib chiqish sabablari yuzasidan surishtiruv ishlari olib borilmoqda.
