Ramazon oyida 2000 dan ortiq masjidning elektr ta’minoti doimiy nazoratga olinadi
Har bir masjidga alohida energetik mutaxassis biriktirildi.
Oʻzbekiston Energetika vazirligi tomonidan muqaddas Ramazon oyi davomida uzluksiz elektr energiyasi bilan ta’minlash maqsadida kompleks chora-tadbirlar rejasi ishlab chiqilishi bo'yicha yig'ilish bo'lib o'tdi.
Maxsus yig‘ilish yakunlariga ko‘ra, Oʻzbekiston hududi bo‘ylab 2000 dan ortiq masjidlarda elektr ta’minoti barqarorligini ta’minlash maqsadida taqsimlash tarmoqlari to‘liq ko‘rikdan o‘tkazilib, aniqlangan kamchiliklar bartaraf etildi. Qarorga muvofiq, taroveh namozlari o‘qiladigan har bir masjidga bittadan mas’ul energetik mutaxassis biriktirildi.
Doimiy nazoratni ta’minlash maqsadida 24 soatlik monitoring tizimiga jami 2547 nafar muhandislik-texnik xodim jalb etildi. Favqulodda vaziyatlarga tezkor javob qaytarish uchun 210 ta maxsus brigada shakllantirilib, ular 250 ta maxsus texnika va uskunalar bilan ta’minlandi.
Elektr uzilishlari xavfini kamaytirish maqsadida masjidlarni elektr bilan ta’minlaydigan taqsimlash tarmoqlari to‘liq texnik auditdan o‘tkazildi. Shuningdek, ehtimoliy favqulodda holatlarda uzluksiz ta’minotni saqlab qolish uchun muhim obyektlarga dizel generatorlari joylashtirilmoqda.
Avvalroq Ramazon oyi munosabati bilan ehtiyojmand oilalarga bir martalik moddiy yordam ajratilishi rejalashtirilgani haqida ham ma’lum qilingan edi.
