Tashiyevning yuqori lavozimda ishlovchi sinfdoshi ham ishdan olindi
Avvalroq Milliy xavfsizlik davlat qoʻmitasi raisi Qamchibek Tashiyev va yana 3 vazir lavozimidan olingan edi.
Qirgʻizistonda yana kadrlar o‘zgarishi yuz berdi. 17-fevral kuni Qirgʻiziston Iqtisodiyot va savdo vazirligi huzuridagi Monopoliyaga qarshi tartibga solish xizmati rahbari lavozimiga yangi tayinlov amalga oshirildi.
Vazirlik matbuot xizmati ma’lum qilishicha, avval mazkur lavozimda faoliyat yuritgan, Qamchibek Tashiyevning sinfdoshi bo'lgan Jenali Ozorayev vazifasidan ozod etilgan. Uning o‘rniga ushbu tizimda uzoq yillardan buyon faoliyat yuritib kelgan Oybek Mamiraliyev rahbar etib tayinlangan.
Ma’lum qilinishicha, Mamiraliyev 2023-yil 7-sentabrdan buyon xizmat raisi o‘rinbosari lavozimida ishlab kelayotgan edi.
Eslatib o‘tamiz, avvalroq Qamchibek Tashiyev ham Qirgʻiziston Milliy xavfsizlik davlat qoʻmitasi raisi lavozimidan ozod etilgani haqida xabarlar berilgan edi. Shundan so‘ng yana bir nechta vazirliklarda ham kadrlar o‘zgarishi kuzatilgan.
