Ukrainaliklar Donbassning topshirilishini hech qachon kechirmaydi — Zelenskiy
Ukraina prezidenti Donbass hududi bo‘yicha kelishuvlar borasidagi pozitsiyasini maʼlum qildi.
Ukraina prezidenti Vladimir Zelenskiy Axios nashriga bergan intervyusida Donbass hududi bo‘yicha kelishuvlar borasidagi pozitsiyasini maʼlum qildi. Prezidentning so‘zlariga ko‘ra, Ukraina xalqi Donbassdan qo‘shinlarni bir tomonlama olib chiqish va mintaqani Rossiyaga topshirishni nazarda tutuvchi har qanday tinchlik kelishuvini rad etadi.
“Hissiy jihatdan odamlar buni hech qachon kechirmaydi. Bu bizning mamlakatimizning bir qismi — yer, bayroq va barcha fuqarolar”, — deya taʼkidladi Zelenskiy.
Ukraina rahbari shuningdek, hududiy masalada yutuqga erishishning eng yaxshi yo‘li Rossiya Prezidenti Vladimir Putin bilan shaxsiy uchrashuv ekanligini yana bir bor qayd etdi. Zelenskiy kelajakdagi har qanday kelishuv milliy referendum orqali tasdiqlanishi kerakligini eslatdi va agar bu kelishuv faqat Donbassdan Ukraina qo‘shinlarini olib chiqishni nazarda tutsa, u suverenitet va fuqarolardan voz kechish sifatida qabul qilinishini aytdi.
Axios‘ga bergan 37 daqiqalik telefon intervyusida Zelenskiy shuningdek, AQSHning Vashingtondagi vositachilik saʼy-harakatlari davomida o‘ziga bosim bo‘lmaganini va u “osongina taslim bo‘ladigan odam emasligini” taʼkidladi.
