Sankt-Peterburgda migrantlarning savdo sohasida ishlashi taqiqlanishi mumkin
Bunga yanvar oyi oxirida “City Mall” savdo markazida yuz bergan qotillik sabab sifatida ko‘rsatilmoqda, gumondorlardan biri O‘zbekiston fuqarosi bo‘lgan.
Sankt-Peterburgda migrantlarga chakana va ulgurji savdo do‘konlarida ishlashni taqiqlash tashabbusi muhokama qilinmoqda. Ushbu masala yanvar oyi oxirida savdo markazida sodir bo‘lgan fojiadan so‘ng kun tartibiga chiqqan.
Maʼlum qilinishicha, voqea City Mall savdo markazidagi Perekrestok supermarketida yuz bergan. Ikki nafar qo‘riqchi o‘g‘irlikda gumon qilingan 24 yoshli mijoz bilan tortishuv jarayonida jismoniy to‘qnashuv yuzaga kelgan, oqibatda jabrlanuvchi shifoxonaga yetkazilgan bo‘lsada, uning hayotini saqlab qolishning imkoni bo‘lmagan.
Rossiya Tergov qo‘mitasi mazkur holatni guruh bo‘lib sodir etilgan qotillik sifatida baholagan. Xabar qilinishicha, qo‘riqchilardan biri O‘zbekiston fuqarosi bo‘lib, tergovdan qochib, qidiruvga berilgan.
Tashabbusni Sankt-Peterburg va Leningrad viloyati Ichki ishlar vazirligi Bosh boshqarmasi rahbari Roman Plugin shahar parlamentiga taqdim etgan yillik hisobotida ilgari surgan. Uning taʼkidlashicha, ayrim savdo tarmoqlari migrantlarni rasmiy ravishda boshqa lavozimlarda ishga rasmiylashtirib, amaldagi cheklovlarni chetlab o‘tmoqda.
Hodisa ortidan huquqni muhofaza qiluvchi organlar tomonidan savdo tarmoqlarida immigratsiya qonunchiligiga rioya etilishi yuzasidan tekshiruvlar o‘tkazilgan. So‘nggi reydlar davomida 64 nafar noqonuniy migrant aniqlangani maʼlum qilingan.
Shuningdek, amaldagi qonunchilikka ko‘ra, chet el fuqarolarining xususiy qo‘riqlash kompaniyalarida ishlashi taqiqlangan. Yangi qonun 2026-yil 1-sentabrdan kuchga kirishi rejalashtirilgan.
Plugin maʼlumotiga ko‘ra, 2025-yilda do‘konlarda litsenziya asosida ishlagan besh mingga yaqin xodim orasida noqonuniy ishlayotgan migrantlar ham bo‘lgan. Shu munosabat bilan chakana va ulgurji savdo sohasida mehnat migrantlarini to‘liq taqiqlash tashabbusi ishlab chiqilmoqda.
Qayd etilishicha, Sankt-Peterburgda vizasiz davlatlardan — jumladan O‘zbekiston, Ozarbayjon, Tojikiston, Moldova va Ukrainadan kelgan migrantlarning taksi hamda yetkazib berish xizmatlarida ishlashiga nisbatan cheklovlar allaqachon joriy etilgan.
