2025-yilda Rossiyadan 72 ming nafar migrant deportatsiya qilingan
Ichki ishlar vaziri qoidabuzar migrantlarni yanada ko‘proq aniqlash uchun qo‘shimcha mablag‘ zarurligini bildirdi.
2025-yil yakunlariga ko‘ra, qonunbuzarliklar sodir etgani sababli 72 ming nafar xorijiy fuqaro Rossiya hududidan deportatsiya qilingan. Bu haqda mamlakat ichki ishlar vaziri Vladimir Kolokoltsev ma’lum qildi.
Vazirning ta’kidlashicha, ushbu ko‘rsatkich huquq-tartibot organlari tomonidan migratsiya sohasida olib borilgan nazorat va profilaktik chora-tadbirlar natijasidir. Mazkur ma’lumotlar Davlat Dumasining Xavfsizlik va korrupsiyaga qarshi kurash qo‘mitasi yig‘ilishida taqdim etilgan.
Kolokoltsev Ichki ishlar vazirligi mavjud resurslar doirasida noqonuniy faoliyat yuritayotgan va deportatsiya qilinishi lozim bo‘lgan shaxslarni aniqlash ishlarini davom ettirayotganini bildirgan. Shu bilan birga, u bunday qoidabuzarlarni yanada kengroq aniqlash va tegishli choralarni kuchaytirish uchun qo‘shimcha moliyaviy mablag‘lar zarurligini qayd etgan.
Rasmiylarga ko‘ra, migratsiya qonunchiligini buzgan shaxslarni aniqlash, ularni ro‘yxatga olish va deportatsiya qilish jarayonlari davlat xavfsizligini ta’minlash hamda qonun ustuvorligini mustahkamlashga qaratilgan.
