AQSH O‘zbekistondagi ayrim shaxslarga viza cheklovlari joriy etdi

 

 

AQSH Davlat departamenti O‘zbekiston hududida noqonuniy immigratsiyani tashkil qilgan shaxslarga nisbatan viza cheklovlarini joriy qildi. Mazkur choralar O‘zbekistonda faoliyat yurituvchi ikkita viza rasmiylashtirish kompaniyasining rahbarlari va yuqori lavozimli mansabdor shaxslariga nisbatan qo‘llanilgan. Bu haqda AQSH Davlat departamenti xabar berdi.

 

Maʼlumotlarga ko‘ra, ushbu shaxslar AQSHga noqonuniy immigratsiya qilishni rejalashtirgan xorijiy fuqarolarga, jumladan voyaga yetmaganlarga, safar xizmatlarini tashkil etishda yordam bergan.

 

Tergov natijalariga ko‘ra, O‘zbekistondagi ayrim shaxslar noqonuniy immigratsiyani rejalashtirgan shaxslar uchun transport va tranzit yo‘nalishlarini muvofiqlashtirgan. Ular aeroportlar orqali va davlatlararo chegaralar orqali Markaziy Amerikadagi tranzit nuqtalargacha yetib borishgan, keyinchalik ushbu shaxslarning aksariyati AQSH hududiga noqonuniy kirishga urinish chog‘ida qo‘lga olingan.

 

Mazkur cheklovlar AQSHning Immigratsiya va fuqarolik to‘g‘risidagi qonunining 212(a)(3)(S)-moddasiga muvofiq qo‘llanilib, ushbu norma AQSH tashqi siyosati manfaatlariga jiddiy salbiy taʼsir ko‘rsatishi mumkin bo‘lgan shaxslarning mamlakatga kirishini taqiqlashni nazarda tutadi.

 

AQSH tomoni milliy xavfsizlik va immigratsiya qonunchiligini buzishga qaratilgan har qanday urinishlarga murosasiz munosabat bildirishini taʼkidladi. Shuningdek, noqonuniy migratsiyadan foyda ko‘ruvchi shaxslar va tarmoqlarga nisbatan qatʼiy choralar ko‘rilishi, odam savdosi va noqonuniy tashish bilan bog‘liq tarmoqlarga qarshi kurash izchil davom ettirilishi qayd etildi.

 

Bayonotda AQSH hukumati O‘zbekiston bilan yaqindan hamkorlikni yuqori baholagan, jinoiy tarmoqlar faoliyatini aniqlash va ularga chek qo‘yish borasidagi hamkorlikning davom etishini taʼkidladi.