Surxondaryoda hokim o'rinbosari, Namanganda hokim yordamchisi pora bilan ushlandi
Jarqo‘rg‘onda hokim o‘rinbosari 90 mln so‘m, Chustda esa hokim yordamchisi 23 ming dollar talab qilgani aniqlanib, jinoyat ishlari qo‘zg‘atildi.
Huquqni muhofaza qiluvchi organlar tomonidan o‘tkazilgan tezkor tadbirlar davomida Surxondaryo va Namangan viloyatlarida mansabdor shaxslarning korrupsion holatlarga aloqador noqonuniy harakatlari aniqlanib, ularga nisbatan qonuniy choralar ko‘rildi. Bu haqda DXX Zamon.uz' ga xabar berdi.
Aniqlanishicha, Surxondaryo viloyati Jarqo‘rg‘on tumani hokimi o‘rinbosari o‘z xizmat mavqeidan foydalangan holda hokimlik zaxirasidagi 9 gektar yer maydonini Sherobod tumanida yashovchi fuqaroga poliz ekinlari yetishtirish uchun 4 oy muddatga ijaraga berish evaziga 90 million so‘m talab qilgan. U joriy yil yanvar oyida ushbu mablag‘ning 30 million so‘mini olgan.
Davlat xavfsizlik xizmati hamda Bosh prokuratura huzuridagi Departament xodimlari hamkorligida o‘tkazilgan tezkor tadbirda mansabdor shaxs qolgan 60 million so‘mni Termiz shahridagi umumiy ovqatlanish shaxobchalaridan birida olayotgan vaqtida ashyoviy dalillar bilan ushlangan.
Mazkur holat yuzasidan unga nisbatan Jinoyat kodeksining 210-moddasi 1-qismi bilan jinoyat ishi qo‘zg‘atilib, “qamoq” ehtiyot chorasi qo‘llangan. Hozirda tergov harakatlari davom etmoqda.
Shuningdek, Namangan viloyati Chust tumanida ham mansabdor shaxsning noqonuniy harakatlariga chek qo‘yildi. Tuman hokimining mahalla fuqarolar yig‘inlaridan biridagi yordamchisi 2022-yilda “Sadaqa” kichik sanoat zonasi hududidan qarindoshiga ajratilgan 43 sotix yer maydonining 20 sotix qismini hokimiyatdagi tanishlari orqali boshqa fuqaro nomiga rasmiylashtirib berish evaziga 23 ming AQSh dollari talab qilgan.
U oldindan 10 ming AQSh dollarini olayotgan vaqtida Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan qo‘lga olingan.
Holat yuzasidan unga nisbatan Jinoyat kodeksining 25, 168-moddasi 4-qismi “a” bandi bilan jinoyat ishi qo‘zg‘atilib, hozirda tergov harakatlari olib borilmoqda.
