O‘zbekistonda fuqarolar o‘z nomlariga nechta bank karta va SIM-karta ro‘yxatdan o‘tganligini tekshirishlari mumkin bo‘ladi
Shubhali kartalar va raqamlarni masofadan bloklash xizmati joriy etiladi.
2026-yil dekabriga qadar O‘zbekistonda fuqarolarning moliyaviy va telekommunikatsiya aktivlarini yagona platforma orqali nazorat qilish imkonini beruvchi yangi tizim joriy etilishi rejalashtirilmoqda. Mazkur xizmat Yagona interaktiv davlat xizmatlari portali (my.gov.uz) orqali ishga tushiriladi.
Yangi funksiyaga muvofiq, foydalanuvchilar o‘z nomiga rasmiylashtirilgan barcha bank kartalari hamda mobil aloqa raqamlarini onlayn tarzda ko‘rish imkoniyatiga ega bo‘ladi. Tizim pasport maʼlumotlari asosida milliy va xalqaro to‘lov tizimlari orqali ochilgan bank kartalarining umumiy sonini tezkor aniqlash imkonini taqdim etadi.
Shuningdek, portal orqali turli mobil operatorlar tarmog‘ida ro‘yxatdan o‘tgan faol SIM-kartalar haqida batafsil maʼlumot olish mumkin bo‘ladi. Agar foydalanilmayotgan yoki shubhali hisoblar aniqlansa, fuqarolar ularni masofadan turib bloklash yoki yopish bo‘yicha ariza yuborish huquqiga ega bo‘ladi. Bu esa bank yoki mobil operator ofisiga shaxsan murojaat qilish zaruratini sezilarli darajada kamaytiradi.
Mazkur xizmat Yagona davlat axborot tizimi doirasida ishga tushirilishi ko‘zda tutilgan bo‘lib, banklar va mobil operatorlarning axborot tizimlari bilan xavfsiz integratsiya taʼminlanadi. Maʼlumotlar real vaqt rejimida yangilanib boradi.
Mazkur tashabbus fuqarolarning shaxsiy maʼlumotlari xavfsizligini mustahkamlash, moliyaviy firibgarliklarning oldini olish hamda raqamli xizmatlardan foydalanish qulayligini oshirishga qaratilgan.
