Qozog‘istonda yo‘lda qolgan avtobusdan o‘zbekistonliklar evakuatsiya qilindi
Qutqaruvchilar qirg'iz, qozoq va o'zbekistonlik 13 nafar yo‘lovchini isitish punktiga joylashtirib, ularga zarur yordam ko‘rsatgan.
Qozog‘iston hududidan o‘tuvchi Ostona–Petropavlovsk avtomagistralida dvigatel nosozligi sababli favqulodda to‘xtab qolgan shaharlararo avtobus yo‘lovchilari qutqaruv xizmatlari tomonidan xavfsiz joyga evakuatsiya qilingan.
Ma’lum qilinishicha, Petropavlovsk shahridan Chimkent yo‘nalishida harakatlangan avtobus Makinsk shahri hamda Makinka qishlog‘i (Aqmola viloyati) oralig‘ida texnik nosozlik tufayli yo‘lda qolib ketgan. Avtobus salonida jami 13 nafar yo‘lovchi bo‘lib, ular orasida 3 nafar O‘zbekiston fuqarosi, 7 nafar Qirg‘iziston fuqarosi va 3 nafar Qozog‘iston fuqarosi bo‘lgan.
Hodisa yuzasidan Qozog‘iston Favqulodda vaziyatlar vazirligi qutqaruvchilari hamda huquqni muhofaza qiluvchi organlar tezkor ravishda voqea joyiga yetib borib, barcha yo‘lovchilarni xavfsiz tarzda evakuatsiya qilgan. Yo‘lovchilar Makinsk shahridagi isitish punktiga joylashtirilib, ularga zarur yordam ko‘rsatildi hamda issiqlik bilan ta’minlangan.
